Англия Премьер-лигасининг энг қўпол кўрсаткичга эга клублари маълум қилинди. Бу борада "Манчестер Юнайтед" ваниҳоят турнир жадвали пешқадамига айланди. Компьютер тартиб-интизом борасидаги статистикани сўнгги беш йиллик давр учун ҳисоблаб чиқди. Бу вақтда АПЛда бўлган 12 та клуб кўрсаткичлари ҳисобга олинди. Натижалар шуни кўрсатдики, "МЮ" қоидабузарлик ва жазоланиш борасида устуворликка эга.

Ортда қолган беш йил давомида "қизил иблислар" жами 386 та сариқ карточка билан жазоланган. Бу эса иккинчи ўриндаги жамоадан 13 тага кўпроқдир. Манкунианликлар бу давр мобайнида, шунингдек, тўққизта қизил карточкага тортилган. Ушбу рақам 12 та клуб ичидаги иккинчи энг ёмон рақамдир. Сариқ карточкалар кўплиги ҳисобига қоидабузарликлар борасида "Манчестер Юнайтед" ўртача ҳисобда биринчи ўринни эгаллайди. Ўртача очкони ҳисоблашда ҳар бир сариқ карточка битта, қизил карточка эса иккита очко сифатида ҳисоблаб олинди. Шунда "МЮ"га ҳар бир ўйин учун ўртача 2.04 очко келиб чиқди. Шу сабабли, "МЮ" "Эвертон"дан юқорида жойлаштирилди.

"Эвертон" иккинчи ўриндаги энг ёмон интизомли жамоага айланган. Клуб АПЛда "Манчестер Юнайтед"дан анча кам сариқ олгани рост. Аммо мерсисайдликларнинг қизил карточкалари сони нақ 17 тани ташкил этади. Бу эса энг ёмон иккита кўрсаткичлардан биридир. Умумий ҳисоблаб кўрилганда "Эвертон"нинг ўртача 2.03 очко берилди. Учинчи поғона "Тоттенхэм"га насиб этди. "Шпорлар"нинг ўртача очкоси 2.02 га тенг. Тўртинчи ўринни "Вулверхэмптон" банд этган бўлиб, "бўрилар"да ҳам аҳвол анчагина ёмон.

Кейинги ўринларда "Арсенал", "Ньюкасл Юнайтед" ва "Кристал Пэлас" келади. Кучли ўнликни эса "Брайтон", "Челси" ва "Вест Хэм" якунлайди.
Қўшимча, изланишлар шуни кўрсатдики, Европанинг кучли бешлик чемпионлари ичида қоидабузарликлар учун энг кўп жазоланган клуб "Хетафе" бўлиб чиқди. Бу клубнинг ўртача очкоси 3.66 тенг. Улар 5 йил давомида 652 та сариқ ва 39 та қизил карточка билан жазоланган. Шунингдек, кейинги ёмон интизомли жамоалар ҳам испан клублари бўлмиш "Севилья" ва "Атлетико де Мадрид"дир.

ИСМАТОВ Ж.