Италия футбол федерацияси "Ньюкасл" ва Италия терма жамоаси ярим ҳимоячиси Сандро Тоналини ноқонуний пул тикиш учун 10 ойга футболдан четлатди. Бу ҳақда Football Italia нашри хабар бермоқда.
Манбага кўра, италиялик ярим ҳимоячи А Серияда ўйнаганида "Милан" ўйинларига пул тикган. У ҳозирда уч миллион евро қарзи борлигини тан олди. Бир пайтлар кредиторлар унинг оёқларини синдиришни ваъда қилиб, унга таҳдид қилишган.
Дисквалификация туфайли италиялик футболчи Англия Премьер-лигасининг қолган мавсумини, шунингдек, агар Италия саралашдан ўта олса, 2024 йилги Европа чемпионатини ўтказиб юборади.
Тонали сўнгги трансфер ойнасида "Милан"дан "Ньюкасл"га 64 миллион евро эвазига ўтган эди. Бу мавсумда ярим ҳимоячи "қарғалар" сафида барча турнирларда 12та ўйин ўтказиб, битта гол урган. Футболчининг амалдаги клуби билан шартномаси 2028 йилнинг июн ойи охиригача амал қилади. Transfermarkt портали футболчининг нархини 60 миллион еврога баҳолаган.
Эслатиб ўтамиз, аввалроқ "Ювентус" футболчиси Николо Фаджоли пул тикиш суриштируви давомида номи тилга олинган биринчи футболчи бўлган ва у аллақачон 7 ойга дисквалификация қилинган эди.
