Italiya futbol federasiyasi "Nyukasl" va Italiya terma jamoasi yarim himoyachisi Sandro Tonalini noqonuniy pul tikish uchun 10 oyga futboldan chetlatdi. Bu haqda Football Italia nashri xabar bermoqda.

Manbaga ko‘ra, italiyalik yarim himoyachi A Seriyada o‘ynaganida "Milan" o‘yinlariga pul tikgan. U hozirda uch million yevro qarzi borligini tan oldi. Bir paytlar kreditorlar uning oyoqlarini sindirishni va’da qilib, unga tahdid qilishgan.

Diskvalifikasiya tufayli italiyalik futbolchi Angliya Premyer-ligasining qolgan mavsumini, shuningdek, agar Italiya saralashdan o‘ta olsa, 2024 yilgi Yevropa chempionatini o‘tkazib yuboradi.

Tonali so‘nggi transfer oynasida "Milan"dan "Nyukasl"ga 64 million yevro evaziga o‘tgan edi. Bu mavsumda yarim himoyachi "qarg‘alar" safida barcha turnirlarda 12ta o‘yin o‘tkazib, bitta gol urgan. Futbolchining amaldagi klubi bilan shartnomasi 2028 yilning iyun oyi oxirigacha amal qiladi. Transfermarkt portali futbolchining narxini 60 million yevroga baholagan.

Eslatib o‘tamiz, avvalroq "Yuventus" futbolchisi Nikolo Fadjoli pul tikish surishtiruvi davomida nomi tilga olingan birinchi futbolchi bo‘lgan va u allaqachon 7 oyga diskvalifikasiya qilingan edi.