«Chelsi» chap qanot himoyachisi Mark Kukurelya yozgi transfer oynasida jamoasini o‘zgartirishi mumkin. Avvalroq xabar qilinganidek, ispaniyalik futbolchini o‘z safiga qo‘shib olishga «Barselona», Madridning «Atletiko»si va «Manchester Siti» qiziqish bildirmoqda.

Jurnalist Xerard Romeroning ma’lumotlariga ko‘ra, agar kataloniyaliklar aniq taklif bilan chiqishsa, 27 yoshli futbolchi aynan «Barselona»ni afzal ko‘radi. Himoyachining narxi 40-50 million yevro atrofida baholanmoqda. Kataloniya grandi vaziyatni o‘rganmoqda, biroq hozircha o‘z tarbiyalanuvchisini qaytarish bo‘yicha rasmiy muzokaralarni boshlashni rejalashtirmayapti.

Yakunlangan mavsumda Kukurelya «Chelsi» safida jami 50 ta o‘yinda maydonga tushib, bitta gol urdi va to‘rtta samarali uzatmani amalga oshirdi.