10 ноябрь куни Индонезияда ўсмирлар (U17) ўртасида жаҳон чемпионати старт олади. Ўзбекистон U17 терма жамоаси шу куни Малига қарши илк учрашувни ўтказади. Жамоамиз бош мураббийи Жамолиддин Раҳматуллаев мусобақа олдидан ўз фикрлари билан ўртоқлашди.

"Мусобақага тайёргарлигимиз айни авжига кирган, тайёрганликнинг сўнгги босқичини ўтаяпмиз. Жамоадаги барча буни ҳис қилиб турибди. Катта йўлни босган ҳолда турнирга яхши ҳолатда келяпмиз.

Мусобақада биринчи ўйин ҳамиша муҳим ҳисобланади. Шунинг учун ҳозирда барча эътиборимизни Малига қарши бўладиган илк баҳсимизга қаратганмиз.

Жаҳон чемпионатига дунёнинг энг кучли жамоалари келади. Улар орасида биз ҳам юртимиз шарафини муносиб ҳимоя қилиб, нималарга қодир эканимизни кўрсатган ҳолда совринли ўринлар учун курашишни мақсад қилганмиз.

Осиё жамоаларига тўхталадиган бўлсам, мезбон Индонезия ўз рақибларига сюрприз тайёрлаб қўйган бўлса керак. Қитъамизнинг қолган жамоалари ҳам ўз ўйин услубига эга бўлган жамоалар ҳисобланади. Осиё жамоалари ҳар рақибга етарли қаршилик кўрсата деб ўйлайман.

Биринчи рақибимиз Мали ҳақида етарли маълумотга эгамиз. Унинг камчилик ва устун томонларини ўрганиб чиқдик. Шунга қараб ўз тактикамизни тузиб чиқяпмиз. Бизни ажойиб ўйин кутиб турибди", — деди Раҳматуллаев ЎФА матбуот хизматига берган интервьюсида.