10 noyabr kuni Indoneziyada o‘smirlar (U17) o‘rtasida jahon chempionati start oladi. O‘zbekiston U17 terma jamoasi shu kuni Maliga qarshi ilk uchrashuvni o‘tkazadi. Jamoamiz bosh murabbiyi Jamoliddin Rahmatullayev musobaqa oldidan o‘z fikrlari bilan o‘rtoqlashdi.

"Musobaqaga tayyorgarligimiz ayni avjiga kirgan, tayyorganlikning so‘nggi bosqichini o‘tayapmiz. Jamoadagi barcha buni his qilib turibdi. Katta yo‘lni bosgan holda turnirga yaxshi holatda kelyapmiz.

Musobaqada birinchi o‘yin hamisha muhim hisoblanadi. Shuning uchun hozirda barcha e’tiborimizni Maliga qarshi bo‘ladigan ilk bahsimizga qaratganmiz.

Jahon chempionatiga dunyoning eng kuchli jamoalari keladi. Ular orasida biz ham yurtimiz sharafini munosib himoya qilib, nimalarga qodir ekanimizni ko‘rsatgan holda sovrinli o‘rinlar uchun kurashishni maqsad qilganmiz.

Osiyo jamoalariga to‘xtaladigan bo‘lsam, mezbon Indoneziya o‘z raqiblariga syurpriz tayyorlab qo‘ygan bo‘lsa kerak. Qit’amizning qolgan jamoalari ham o‘z o‘yin uslubiga ega bo‘lgan jamoalar hisoblanadi. Osiyo jamoalari har raqibga yetarli qarshilik ko‘rsata deb o‘ylayman.

Birinchi raqibimiz Mali haqida yetarli ma’lumotga egamiz. Uning kamchilik va ustun tomonlarini o‘rganib chiqdik. Shunga qarab o‘z taktikamizni tuzib chiqyapmiz. Bizni ajoyib o‘yin kutib turibdi", — dedi Rahmatullayev O‘FA matbuot xizmatiga bergan intervyusida.