Қуйида «манкунианликлар»нинг муваффақиятсиз шартномалари ҳақида гаплашамиз. Антони «Манчестер Юнайтед»да: клубнинг энг ёмон қарорларидан бири.
Сўнгги йилларда «Манчестер Юнайтед» кўпинча хато трансферлар билан ўз йўлидан адашиб қолди. Бу, шунингдек, катта миқдорда инвестиция қилинган операцияларга ҳам тегишли. Эрик тен Хаг келиши билан «Манчестер Юнайтед» трансфер бозорида ўзини ақллироқ тутади деб тахмин қилинганди. Лекин аслида клуб йўқотишлар билан ишлашни ўрганмаган. 95 миллион евро эвазига Антонининг трансфери ана шундай мисоллардан биридир. 2022 йилнинг ёзида «манкунианликлар» бразилиялик футболчи учун айнан шундай пул тўлаганлар.
Антонининг «Юнайтед»даги фаолияти қандай кетаётганини ҳисобга олсак, унга нисбатан шубҳалар пайдо бўла бошлайди. Ҳатто «Аякс» ҳам 23 ёшли вингерни бунчалик фойдали суммага сотишини кутмаган бўлса керак. Голландия клуби футболчи учун доимий равишда музокаралардаги улушларни кўтарди ва «Манчестер Юнайтед» уларни ҳар қанақа ҳолатда ҳам қабул қилишга мажбур эди. Бразилиялик футболчининг трансферида футболчи билан яхши таниш бўлган мураббийнинг илтимоси катта аҳамият касб этгани аниқ эди. Тен Хаг «Олд Траффорд»га келишидан олдин бу футболчини ҳеч ким танимаган бўлса керак.
Натижада клуб мураббийнинг илтимосини бажариб, футболчи учун 95 миллион евро тўлаб берди. Бу «Аякс» учун рекорд сотувдир. Аввалроқ Голландия клуби учун энг қиммат трансфер 86 миллион евро эвазига «Барселона»га ўтган Френки де Йонг бўлганди. «Юнайтед» учун бу келишув клуб тарихидаги иккинчи энг қиммат шартномага айланди. «Манчестер Юнайтед» фақат Поль Погба учун кўпроқ пул тўлаган (105 миллион евро). «Манкунианликлар» Жейдон Санчо (85 миллион евро) учун Дортмунднинг «Боруссия»сига ҳам бунча сумма бермаганди. Англиялик футболчи «Юнайтед»га ўтишдан олдин Бундеслигада «ёндираётганди», лекин Антони нима билан эсда қолди?
«Аякс»да бразилиялик яхши ўйин намойиш этди, аммо ажойиб ўйинчи эмас эди. Эредивизиянинг биринчи мавсумида у гол+пас тизимидан фойдаланган ҳолда 17 очко (9+8), иккинчи мавсумда 12 (8+4) очко жамғарди. Бу Антонининг ўйинлари ажойиб ўтган дегани эмас. Голландия чемпионатида ҳужумкор ўйинчилар кўпроқ очко тўплашга қодир. Футболчининг кучли томонлари ёши, тезлиги ва техникаси бўлиши керак эди. Аммо, Англияда таъкидланганидек, бразилияликнинг ижодкорлиги ва футбол заковати паст бўлиб чиқди. Бу омилларсиз на тезлик, на техника ёрдам беради. Ҳамма нарса ўзаро боғлиқ бўлиши керак.
Антони «Арсенал»га қарши АПЛда дебют қилди ва 35-дақиқада ҳисобни очди. «Юнайтед» топ ўйинда ғалаба қозонди, қиммат футболчи гол урди - ҳаммаси умидли кўринганди. Қолаверса, бразилиялик футболчи дебютидан сўнг яна иккита ўйинда, жумладан, «Манчестер Сити»га қарши дербида гол урди. Лекин ҳаммаси шу холос. Шундан сўнг вингер ўзи иштирок этган лиганинг кетма-кет 14 учрашувида сермаҳсуллик кўрсата олмади. Мавсум охирига келиб, футболчи «Ноттингем Форест»га қарши ўйинда гол урди ва голли пас берди ва «Вулверхэмптон»га қарши ўйинда голли узатма берди.
«Олд Траффорд»даги ёрқин дебютидан сўнг, Антони тезда сўниб кетди. Премьер-лиганинг 25 ўйинида 4 гол ва 2 голли узатма 95 миллион евролик футболчидан кутилган натижа эмас. Қанот футболчиси Европа лигасида «Барселона» ва «Бетис» дарвозасига гол урди, бироқ «Севилья»га қарши чорак финал ўйинларида гол ура олмади, «Манчестер Юнайтед» бу ўйинда муваффақиятсизликка учради. Бу мавсумда бразилиялик бундан ҳам ёмонроқ ҳаракат қилмоқда. У барча турнирларда 11 та ўйин ўтказган ва битта ҳам самарали ҳаракат йўқ. Футболчи мослашиш учун етарли вақтга эга эди, шунинг учун ҳозирги статистик маълумотлар унинг сифатини яққол кўрсатиб беради.
