ЖЧ-2026 саралаш босқичи 2-турида Эрон терма жамоаси Тошкентга ташриф буюради. Форсларнинг кўп ўйинчилари легионер мақомида хориж чемпионтларида фаолияти юритишади. Хўш, улар ҳозир қандай формада. Шу ҳақда тўхталиб ўтамиз.

1. Меҳди Торимий ("Порту") — "Sofascore" талқинига кўра, УЕФА Чемпионлар лигасидаги энг яхши ҳужумчилар бешлигидан ўрин олган;

2. Сардор Азмун ("Рома") — римликлар сафидаги дастлабки голини урди ва ўзининг олдинги формасига қайтмоқда;

3. Муҳаммад Муҳибий ("Ростов") — Россиядаги илк мавсумидаёқ 2 та гол ва 3 та ассист билан жамоанинг асосий чап қанот вингерига айланиб бўлди;

4. Алиризо Жаҳонбахш ("Фейеноорд") — мавсумни кўнгилдагидек бошламаган эди, лекин "АЗ"га қарши сўнгги учрашувни асосий таркибда бошлаб, ассист қайд этди;

5. Самон Қуддус ("Брентфорд") — ўз жамоасида 2-таймдан тушириладиган ярим ҳимоячи. Премьер-лигада октябрнинг "Энг чиройли голи" муаллифи бўлди;

6. Эҳсон Ҳожсафий ("АЕК", Греция) — ўз жамоасининг асосий чап қанот ҳимоячиси. Тажрибали футболчи сўнгги пайтларда кичик жароҳатлардан азият чекмоқда;

7. Аҳмад Нуруллоҳий ("Ал Ваҳда") — абу-дабиликларнинг асосий таянч ярим ҳимоячиси;

8. Мажид Ҳуссайний ("Кайсериспор") — жароҳатидан қутулган марказий ҳимоячи, ўз жамоасининг сўнгги 3 та ўйинини асосий таркибда бошлади;

9. Али Каримий ("Кайсериспор") — 1 та гол ва 1 та ассист билан ўз жамоасининг асосий таянч ярим ҳимоячиси;

10. Карим Ансорифард ("Омония", Кипр) — асосий таркибдаги ўрнини йўқотган ҳужумчи, захирадан майдонга туширилади;

11. Саид Иззатуллоҳий ("Вайле", Дания) — асосий таркиб ўйинчиси бўлишига қарамасдан, бу мавсум беқарор ўйин кўрсатмоқда;

12. Милод Муҳаммадий ("АЕК") — захира ўйинчиси бўлишига қарамасдан, ҳамюрти Ҳожсафи ўрнига туширилганда, жамоа ўйинини кучайтира олади;

13. Содиқ Муҳаррамий ("Динамо Загреб") — мавсумни асосий ўнг қанот ҳимоячиси сифатида бошлаган эди. Аммо муваффақиятсиз ўйинлардан сўнг захирада қолдирилмоқда;

14. Амин Ҳазбовий ("Ас-Садд") — чемпионат ўйинларида асосий таркибда тушишига қарамасдан, ОЧЛ ўйинларини захирада ўтказмоқда;

15. Умид Иброҳимий ("Аш-Шамал", Қатар) — 36 ёшда бўлишига қарамасдан, ўз жамоасининг асосий таянч ярим ҳимоячиси ҳисобланади.