Германия Бундеслигасида мураббий истеъфоси содир бўлди. Урс Фишер «Унион Берлин» бош мураббийлигидан озод этилди, бу ҳақда клуб расмий сайти хабар берди.
Бундай қарор жамоа раҳбарияти ва бош мураббийнинг ўзаро келишувига кўра қабул қилинган. Бунга Берлин жамоасининг Германия чемпионатидаги ҳалокатли натижалари сабаб бўлди.
11 турдан сўнг Унион атиги 6 очко тўплади ва турнир жадвалида охирги ўринда бормоқда. Бундеслиганинг навбатдаги ўйинида Берлин жамоаси «Аугсбург» билан тўқнаш келади. Ўйин 25 ноябрь, шанба куни бўлиб ўтади.