Ўзбекистон U-17 терма жамоаси бош мураббийи Жамолиддин Раҳматуллаев Жаҳон чемпионати нимчорак финал учрашувига тайёргарлик, машғулотлар ва Англияга қарши ўйин ҳақида фикр билдириб ўтди.

"Англияга қарши ўйин олдидан бизда хавотир йўқ. Илк навбатда гуруҳдан чиқиш вазифасини уддаладик. Бундан кейин кучсиз рақибни кутиш хато бўлади. Шунинг учун ҳеч қандай хавотир йўқ.

Рақиб ҳақида тўхталадиган бўлсам, Англиянинг ҳар бир ёш тоифасидаги терма жамоалари яхши савиядаги футболчилар бор. Англия — дунёнинг энг яхши терма жамоаларидан бири ҳисобланади. Рақибни ўрганиб чиқяпмиз. Бу жамоанинг ҳар бир чизиғида топ-клубларда ўйнайдиган футболчилар бор. Ҳар қандай жамоанинг устун томони билан биргаликда камчиликлари ҳам бўлади. Шундан келиб чиқиб машғулотларда тайёргарлик кўряпмиз. Бизни қизиқарли баҳс кутиб турибди, деб ўйлайман.

Ўз ўйин режамизни эса ошкор қилмайман. Буни ўйин кўрсатади. Янги тарих яратишга ҳаракат қиламиз ва бу нарса бизнинг қўлимиздан келади.

Бундай юқори даражаги турнирдаги ўйинлар орқали футболчиларимиздаги ўзига бўлган ишонч ошди, ҳар қандай рақиб билан бемалол ўйнаш мумкинлигини шогирдларим англаб етди. Бу нарса мени қувонтиряпти. Бу ҳақда футболчилар билан кўп гаплашяпмиз. Бизни ажойиб ўйин кутиб турибди", — деди Раҳматуллаев.