O‘zbekiston U-17 terma jamoasi bosh murabbiyi Jamoliddin Rahmatullayev Jahon chempionati nimchorak final uchrashuviga tayyorgarlik, mashg‘ulotlar va Angliyaga qarshi o‘yin haqida fikr bildirib o‘tdi.

"Angliyaga qarshi o‘yin oldidan bizda xavotir yo‘q. Ilk navbatda guruhdan chiqish vazifasini uddaladik. Bundan keyin kuchsiz raqibni kutish xato bo‘ladi. Shuning uchun hech qanday xavotir yo‘q.

Raqib haqida to‘xtaladigan bo‘lsam, Angliyaning har bir yosh toifasidagi terma jamoalari yaxshi saviyadagi futbolchilar bor. Angliya — dunyoning eng yaxshi terma jamoalaridan biri hisoblanadi. Raqibni o‘rganib chiqyapmiz. Bu jamoaning har bir chizig‘ida top-klublarda o‘ynaydigan futbolchilar bor. Har qanday jamoaning ustun tomoni bilan birgalikda kamchiliklari ham bo‘ladi. Shundan kelib chiqib mashg‘ulotlarda tayyorgarlik ko‘ryapmiz. Bizni qiziqarli bahs kutib turibdi, deb o‘ylayman.

O‘z o‘yin rejamizni esa oshkor qilmayman. Buni o‘yin ko‘rsatadi. Yangi tarix yaratishga harakat qilamiz va bu narsa bizning qo‘limizdan keladi.

Bunday yuqori darajagi turnirdagi o‘yinlar orqali futbolchilarimizdagi o‘ziga bo‘lgan ishonch oshdi, har qanday raqib bilan bemalol o‘ynash mumkinligini shogirdlarim anglab yetdi. Bu narsa meni quvontiryapti. Bu haqda futbolchilar bilan ko‘p gaplashyapmiz. Bizni ajoyib o‘yin kutib turibdi", — dedi Rahmatullayev.