ОКМК бош мураббийи Миржалол Қосимов ОЧЛ 5-тури доирасидаги "Ал-Иттиҳод"га қарши ўйин олдидан ўз фикрларини билдирди.

"Эртага жуда катта жамоага қарши майдонга чиқамиз. Бу Олмалиқ шаҳри учун тарихий кун. Биласиз, 4-турдан кейин гуруҳдан чиқиш имкониятини тўла йўқотдик. Шу сабабли йигитларда ҳеч қандай босим йўқ.

Йўқотишларга келадиган бўлсак, Рубен Санчез ва Шоҳруҳ Гадоев жароҳат туфайли эртага бизга ёрдам бера олишмайди. Акром Комилов эса дисквалификация қилинган.

Бундай катта номларни керак бўлса, пул тўлаб ҳам олиб келолмайсиз. Биз ўз меҳнатимиз эвазига буни уддаладик. Эртага стадионга мухлисларнинг катта оқими кутиляпти. Уларнинг олдида ёпиқ ўйин кўрсатсак ярашмайди. Бензема ёки қайсидир футболчини персонал равишда ёпишга эмас, жамоавий футбол кўрсатишга ҳаракат қиламиз", - деди Қосимов.

Эслатиб ўтамиз, баҳс 27 ноябрь куни 21:00 да старт олади.