Ўзбекистон терма жамоаси ҳимоячиси Виталий Денисов янги мавсумдан бошлаб Россиянинг «Локомотив» клубида тўп суради. Бу ҳақда москваликлар расмий сайти хабар тарқатмоқда.
Манбанинг маълум қилишича, томонлар уч йиллик шартномага имзо чекишган. Шартноманинг молиявий шартлари ошкор қилинмаган.
«Виталий Денисов бир неча йилдан буён Украина чемпионатида барқарор футбол намойиш этиб келмоқда. Бу муддат ичида у ўзини ҳар томонлама кўрсата олди. Умидли ҳимоячи ўзининг ҳужумларга тез қўшила олиши билан ажралиб туради. Унинг жамоамиз сафига келиб қўшилиши «Локомотив» ўйинини ўстиради», дея гапириб ўтди клуб селекция бўлими бошлиғи Кирилл Котов.
Эслатиб ўтамиз, Денисов бунгача Украинанинг «Днепр» клубида 164 учрашувда майдонга тушганди. Россияда эса унинг олдинги клуби Москванинг ЦСКА клуби бўлган. Ушбу жамоа сафида футболчи УЕФА кубоги бош совринини қўлга киритди.
