Каталониянинг "Барселона" клуби дарвозабони Марк-Андре тер Штеген келаси ҳафта охирида Испания чемпионати доирасида "Атлетико"га қарши ўйинда майдонга қайтади. Журналист Хави Мигелнинг маълумотларига кўра, германиялик посбон "матрасчилар" билан бўладиган ўйингача тикланади.

Эслатиб ўтамиз, Тер Штеген "Барселона"нинг "Райо Вальекано" ва "Порту"га қарши сўнгги икки ўйинини белидаги муаммолар туфайли ўтказиб юборганди. Бу ўйинларнинг ҳеч бирида захира дарвозабони Иньяки Пенья ўз дарвозаси дахлсизлигини сақлаб қола олмади.

"Барселона" ҳафта охири бўлиб ўтган тўқнашувда "Атлетико"ни мағлуб этса, Испания чемпионатида учинчи ўринни қайтариб олиши мумкин. "Кўк-анорранглилар" биринчи ўриндаги "Реал"дан тўрт очко ортда қолмоқда.