"Ростов" ҳимоячиси Илья Кирш Россия кубоги 1/4 финали доирасида ЦСКАга (1:1) қарши биринчи ўйиндан сўнг ҳамюртимиз Аббосбек Файзуллаевнинг ўйини ҳақида ўз фикрлари билан ўртоқлашди.
"Мен унда ҳеч қандай ўзгача нарсани кўрмадим. Ҳа, у яхши техникага эга. Ўйлайманки, унинг паст бўйли ва чаққон бўлиши бизнинг лигада унга катта ёрдам беради. Катта ҳимоячиларни четлаб ўтиш осон", - деди Кирш "РБ Спорт" билан суҳбатда.
Жорий мавсумда 20 ёшли Файзуллаев ЦСКА сафида 16 та ўйинда майдонга тушиб, 2 та гол урди ва 8 та голли узатмани амалга оширди. Эътиборли томони, ёш вингер "қизил-кўклар" ва "Ростов" ўртасидаги кубок учрашувида энг яхши футболчи деб топилди. Бу жамоаларнинг жавоб ўйини келаси йилнинг март ойига белгиланган.
