Испаниянинг «Барселона» клуби собиқ бош мураббийи Хосеп Гвардиола Англия чемпионатида ишлашни хоҳлашини маълум қилди. Бу ҳақда Goal.com интернет-нашри хабар бермоқда.

Гвардиоланинг қайд этишича, у футболчи сифатида ўз кучини Англия чемпионатида синаб кўра олмаган, бироқ бу мусобақа уни кўпдан бери қизиқтириб келади. 41 ёшли испаниялик инглиз премьер-лигасини ноёб чемпионат деб атади, Гвардиола айниқса ишқибозларни алоҳида ажратиб кўрсатди.

Унинг сўзларига кўра, Италия ёки Лотин Америкасида муваффақиятсизликка учраса ишқибозлар жамоада юз ўгиришлари мумкин, бироқ инглих мухлислари ўз ўйинчилари ва мураббийларини мунтазам қўллаб-қувватлаб туришади.

Гвардиола «Барселона»ни 2012 йилнинг майида, жамоадаги тўрт йиллик фаолиятидан сўнг тарк этган эди. Мураббий ўшанда дам олишни хоҳлашини маълум қилиб, бошқа жамоалардан тушган таклифларни рад этганди. Бироқ январь ойида 41 ёшли Гвардиола 2013 йилнинг ёзида мураббийлик ишига қайтишни режалаштираётганини билдирди.

Испаниялик мутахассисга кўплаб машҳур клублар иш таклиф қилишга тайёр бўлиб тургани ҳақида хабарлар тарқатилмоқда, бироқ Гвардиола учун энг асосий даъвогар сифатида Англиянинг «Манчестер Сити» ва «Челси» клублари кўрсатилмоқда.

Англия матбуотининг ёзишича, Гвардиола «Манчестер Сити»нинг таклифини аллақачон қабул қилиб бўлган ва жорий мавсум якунига етиши билан унга бош мураббий этиб тайинланади. Тахминларга кўра, Гвардиола Англия чемпионатининг энг кўп маош оладиган мураббийига айланади. Унга, барча солиқларни ҳисобга олган ҳолда, йилига 10 миллион фунт-стерлинг маош тўланади.