Мадриднинг «Реал» клуби ҳужумчиси Криштиану Роналду УЕФА рамзий терма жамоасидан жой олиш бўйича рекорд ўрнатди. Бу ҳақда ташкилот расмий сайти хабар бермоқда.

УЕФА расмий сайти 2001 йилдан бери рамзий терма жамоани аниқлаш бўйича сайт ўқувчилари ўртасида сўровнома ўтказади. «Реал» ҳужумчиси фаолияти давомида еттинчи марта ушбу жамоадан ўрин олди.

Рамзий терма жамоадан, шунингдек, Роналдунинг уч нафар клубдоши – дарвозабон Икер Касильяс, ҳимоячи Серхио Рамос ва ярим ҳимоячи Месут Ўзил (биринчи марта) ҳам ўрин олган.

2012 йил якунларига кўра «Барселона»дан ҳам тўрт нафар футболчи – ҳимоячи Херард Пике, ярим ҳимоячилар Хави Эрнандес ва Андрес Иньеста, шунингдек, ҳужумчи Лионель Месси ҳам рамзий термага кирган.

Рамос ва Пикедан ташқари Франциянинг ПСЖ клуби вакили Тьяго Сильва (биринчи марта) ва Мюнхеннинг «Бавария» клуби футболчиси Филипп Лам ҳам йилнинг энг яхши ҳимоячилари қаторига киришди. Шунингдек, Туриннинг «Ювентус» клуби ярим ҳимоячиси Андреа Пирло ҳам ушбу терма жамоадан биринчи марта жой олди.

Сўровномада деярли 500 минг киши иштирок этган бўлиб, улар 5,3 миллиондан ортиқ овоз қолдиришган. Овозларнинг энг кўпи – 75 фоизи – «Барселона» ярим ҳимоячиси Андрес Иньестага берилганини қайд этиш жоиз.