"Манчестер Юнайтед" 2027 йил ёзида асосий эътиборни ҳимоя чизиғини кучайтиришга қаратади. ESPN журналисти Роб Доусон маълумотига кўра, клуб раҳбарияти таркибни босқичма-босқич қайта қуриш стратегиясини давом эттирмоқчи. ESPN бу ёндашувни "building blocks", яъни "қурилиш блоклари" деб таърифламоқда.
Бу стратегиянинг моҳияти ҳар бир трансфер ойнасида энг муаммоли чизиқни кучайтириш ва кейин яна ўша позициядаги хатоларни тузатишга маблағ сарфлашга мажбур бўлмасликдан иборат.
2025 йил ёзида "Юнайтед" ҳужум чизиғини Матэус Кунья, Брайан Мбеумо ва Беньямин Шешко билан кучайтирганди. Жорий ёзда эса марказий яримҳимоя устувор йўналиш бўлди: Юри Тилеманс, Андрей Сантос ва Карлос Балеба харид қилинди. Уларнинг умумий қиймати тахминан 155 млн фунтни ташкил этди.
Энди навбат ҳимояга келади. Манкунианликлар ёзда чап қанот ҳимоячиси олишга уринган, аммо бу вазифани бажара олмади. ESPN'га кўра, "РБ Лейпциг"дан Давид Раумни тахминан 30 млн фунтга олиш имконияти бўлган, бироқ клуб 28 ёшли футболчи билан узоқ муддатли шартнома тузишни келгуси режаларга халақит бериши мумкин деб ҳисоблаган. "Ньюкасл" футболчиси Льюис Холл эса асосий нишонлардан бири бўлиб қолмоқда.
Transfermarkt маълумотига кўра, Лисандро Мартинес, Харри Магуайр ва Люк Шоунинг амалдаги шартномалари 2027 йил ёзида тугайди. Бу ҳам ҳимояни янгилаш заруратини кучайтиради.
