Осиё чемпионлар лигаси гуруҳ босқичи, 6-тур доирасидаги «Эйр Форс» — ОКМК учрашувидан олдин ташкиллаштирилган матбуот анжуманида олмалиқликлар устози Миржалол Қосимов ва ҳимоячи Сардор Раҳмонов иштирок этди.

— Бу биз учун мавсумдаги охирги ўйин. Миллий чемпионатимиз якунига етди. Осиё чемпионлар лигаси биз учун катта тажриба бўлди.

— Ўзбек клубларининг ҳозирги ҳолати ҳақида фикрингиз қандай? Авваллари ўзбек жамоалари Осиё чемпионлар лигасида плей-оффга чиқар эди. Ҳозирда уларнинг кейинги босқичга чиқиши сўроқ остида турибди.
— Менимча, ўзбек клубларининг савияси ёмон эмас. Чемпионлар лигасида 4 та клубимизнинг иштирок этиши даражамиз ёмон эмаслигини билдиради. Қолаверса, олдин гуруҳдан икки жамоа кейинги босқичга чиқар эди. Ҳозир эса 2-ўринни эгаллаган орасида 3 таси плей-оффга чиқади. Айтиб ўтилганидек, 3 жамоамизда нимчорак финалга чиқиш учун яхши имконият бор.

— ОКМК "Сепаҳон"га 9 та тўп фарқи билан ютқазди, аммо аввалги турда "Ал-Иттиҳод"дек кучли жамоага қарши жуда яхши ўйин ўтказди. Бунинг сабаби нимада?
— Шунинг учун ҳам футболни бутун дунёда яхши кўришади. "Сепаҳон"га қарши тур баҳсида бизнинг кунимиз эмасди. Бундан ташқари, ўзига яраша муаммоларимиз бор эди. Асосий таркибнинг 7-8 нафар аъзосида жароҳат бор эди. Қизил карточка ҳам натижанинг йирик бўлиб кетишига таъсир кўрсатди. Футболда бундай йирик ҳисоблар учраб туради. Бу ҳам ўзига яраша натижа. Ўйинчилар бу мағлубиятни унутиб, "Ал-Иттиҳод" билан учрашувда яхши ўйин намойиш этишди.

— Эртанги ўйин олдидан қандайдир қўрқувлар борми?
— Гуруҳимизда кучли жамоалар йиғилган. "Эйр Форс"ни ҳурмат қилган ҳолда майдонга чиқамиз. Бизда ҳеч қандай қўрқув йўқ. Агар қўрқув бўлганида футбол ўйнамасдик. Имкон қадар яхши натижа учун ҳаракат қиламиз. Аммо осон бўлмайди. Чемпионатимизнинг сўнгги турида оғир ўйин ўтказдик ва бу ерга йўл босиб келдик. Ҳали жароҳатидан фориғ бўлмаган футболчилар ҳам бор. Шунга қарамасдан, майдонга мухлисларимизни хурсанд қилиш учун чиқамиз.