Франциянинг “Лион” клуби жорий мавсумдаги ёмон ўйинлари туфайли логистик муаммога дуч келди.
13 ўйиндан сўнг "Лион" атиги 7 очкога эга ва атиги битта ғалаба билан Лига 1 турнир жадвалида охирги ўринда бормоқда.
Агар "Лион" мавсум якунида плей-оффда ўйнаш ҳуқуқини қўлга киритса, ўз мухлислари қаршисида уй учрашувини ўтказа олмайди. Муаммо шундаки, машҳур қўшиқчи Тейлор Свифтнинг концертлари 2-3 июнь кунлари "Лион"нинг уй аренасида ўтказилиши режалаштирилган. Бу саналар Лига 2 жамоаларига қарши икки ўйинли плей-оффнинг жавоб ўйинлари тақвимига тўғри келади.
Плей-офф йўлланмасини қўлга киритиш учун "Лион" 16-ўринни эгаллаши керак. Ҳозирда бу ўринни "Лорьян" 12 очко билан банд этиб турибди.
Daily Mail нашрининг ёзишича, "Лион" раҳбарияти атайлаб Свифтнинг концертларига рози бўлган, бироқ уларнинг жамоаси лигада жон сақлаб қолиш учун кураш олиб боришини тасаввур ҳам қилмаган.
