Александр Чеферин УEФА раҳбариятида 2031 йилгача қолиши мумкин.
Европа футбол ассоциациялари иттифоқининг амалдаги президенти ташкилот низомига ўзгартиришлар киритишни режалаштирмоқда, бу эса унга тўртинчи муддатга сайланиш имконини беради, деб хабар бермоқда Daily Mail.
Чеферин 2016 йилда УEФА президенти лавозимидан четлаштирилган Мишель Платинининг ўрнига сайланган эди. Платини ўз лавозимида қолиши керак бўлган 2,5 йил давомида словениялик Иттифоқни бошқарган, кейин эса икки марта – 2019 ва 2023 йилларда қайта сайланган. Унинг ваколат муддати 2027 йилда тугайди.
Ҳозирда УEФА раҳбариятидаги тўрт йиллик муддатлар сони кетма-кет учтаси билан чекланган, бу чегарани Чефериннинг ўзи белгилаган. Бироқ, таклиф қилинган тузатишга кўра, 2017 йил июлидан олдин бошланган ҳар қандай давр ҳисобга олинмайди. Бу УEФА раҳбарига яна ўз номзодини қўйиш имконини беради.
Таклиф этилаётган тузатишлар Париждаги Конгрессда овозга қўйилади.
Қайд этилишича, УEФА ижроия қўмитаси аъзоси, “Манчестер Юнайтед”нинг собиқ директори Девид Гилл низомга ўзгартириш киритишга қарши. Унинг сўзларига кўра, таклиф этилаётган тузатишлар нодемократик ва футбол манфаатларига мос келмайди.
66 ёшли мутахассис, шунингдек, президентлик ва ижрочи лавозимларни эгаллаганлар учун амалдаги чегарани узайтириш УEФАни "ФИФА собиқ президенти Зепп Блаттер ва унинг УEФА ҳамкасби Мишель Платини билан тавсифланган ёмон футбол бошқаруви даврига" қайтариши мумкинлигини айтди.