Ўзбекистон ёшлар терма жамоасининг Ҳамдўстлик кубогидаги 2та ўйинида Аббос Махсталиев фаол ҳаракат қилди. У ўнг қанотдан россиялик ва қозоғистонлик ҳимоячиларга тиним бермади. Бундан 3 йил аввал мухлисларимизга яхши таниш бўлишга улгурган футболчининг Қозоғистонга қарши ўйиндаги фикрлари билан қизиқдик.

— Қозоғистон билан ўйин биз учун муҳим аҳамиятга эга эди. Боиси, 1-турдан кейин бизнинг ҳисобимиз 1 очко бўлса, рақибимизда 3 очко мавжуд эди. Агар Қозоғистонни мағлуб этсак, чорак финал йўлланмасини ҳал қилардик. Шуни ҳис қилган ҳолда майдонга тушдик.

— Россия ва Қозоғистон терма жамоаларидан қайси бирини кучлироқ деб ҳисоблайсиз?
— Фикримча, мезбон — Россия терма жамоасини кучлироқ.

— Маълумки, 2018 йилги жаҳон чемпионати айнан Россияда ўтади. Насиб қилса, сиз миллий терма жамоамиз билан бирга ўша мундиалга ташриф буюришингиз мумкин. Ана ўшанда ҳозирги Россия ёшлар терма жамоасининг қайси футболчиси билан юзма-юз келишни истардингиз?
— Аввало жаҳон чемпионатида иштирок этишнинг ўзи катта бахт. Унда мезбон жамоага қарши ўйнаш ҳам фахр. Агар шундай бахт менга насиб қилса, Россия ёшлар терма жамоасининг 7-рақамдаги (Амбурцумян — stadion.uz) футболчисига қарши ўйнашни истардим. У менда яхши таассурот қолдирди.

Дилмурод, Санкт-Петербург