Халқаро футбол федерацияси – ФИФА президети Зепп Блаттер МДҲ чемпионатини ўтказиш имкони йўқлигини таъкидлаб, Россия футбол иттифоқи раҳбари Николай Толстихга Россия чемпионатини сақлаб қолишни маслаҳат берди. Бу ҳақда, «Интерфакс» ахборот агентлигига асосланиб, «Лента.Ру» хабар бермоқда.

«Ҳамдўстлик чемпионатини ўтказиш – нотўғри қарор. У ФИФА тузилмасини бузиши ва футбол оиламиз ичидаги бағрикенгликка катта зарар етказиши мумкин. Мен Николай Толстихга ўз чемпионатининг тарафдори бўлишни ва бошқа лигалар ҳақида ўйламасликни маслаҳат бермоқчиман», – деди Блаттер Санкт-Петербургда бўлиб ўтган матбуот анжуманида.

Унинг қўшимча қилишича, ФИФА «бундайин мусобақанинг ўтказилишидан» мутлақо манфаатдор эмас. «Клублар ўртасидаги мусобақалар миллий уюшмалар доираси ва уларнинг назоратида ўтказилади. У мамлакат чегараси ва ўша мамлакатга тегишли уюшмаси чегараси доирасида бўлади. Бу – энг асосий тамойилдир», – деди Блаттер. ФИФА президентининг қўшимча қилишича, Чемпионлар лигаси ёки Либертадорес Кубоги каби мусобақалар ягона истиснолар ҳисобланади.

Россия футбол премьер-лигаси (РФПЛ) бошчилигида МДҲ чемпионатини ташкил этиш лойиҳаси тўғрисида 2012 йилнинг ноябрь ойида премьер-лига раҳбари Сергей Прядкин гапирган эди. У ушбу ғояни «тўғри ва қизиқарли» деб атаган эди. Декабрь ойида эса лойиҳани ишлаб чиқиш бўйича гуруҳ тузилиб, унга Валерий Газзаев раҳбар этиб тайинланган эди.

Аввалроқ, собиқ Иттифоқ мамлакатлари жамоалари ўртасидаги футбол мусобақани қайта ташкил этишнинг истиқболли эканлигини тўғрисида Санкт-Петербургнинг «Зенит» клуби бош ҳомийси ва «Газпром» раҳбари Алексей Миллер гапирган эди. Ушбу ғояни Махачқалъанинг «Анжи», Москванинг ЦСКА, Киевнинг «Динамо»си, Борисовнинг БАТЭ ва Арманистон футбол федерацияси раҳбарияти қўллаб-қувватлаган эди.