Қирғизистон ва Ўзбекистон терма жамоалари ўртасидаги ўйиндан кейинги матбуот анжуманида иштирок этган Аҳмаджон Мусаев ўйинчи алмаштиришларни эртароқ амалга оширганида, ўйинда ғалаба қозониши мумкинлигини айтиб ўтди.

Аҳмаджон Мусаев, Ўзбекистон ёшлар терма жамоаси бош мураббийи:
— Рақиб жамоадаги ҳамкасбимдан фарқли равишда, олдимда фақат ғалаба қозониш вазифаси йўқ эди. Шунинг учун мен ўйинни иккинчи таркиб билан бошлашга қарор қилдим. Лекин,  тушуниб етдимки, захирадагилар ҳозирча бундай юқори савияда ўйнашга тайёр эмасканлар. Шунинг учун дарҳол 6та алмаштиришни амалга оширдим. Майдонга ўйинни кучайтириши керак бўлган футболчилар тушишди. Агар ўйинчиларни эртароқ алмаштирганимда ғалаба қозонишимиз ҳам мумкин эди. Биз эса фақат ҳисобни тенглаштира олдик, холос. Ҳамкасбимга чиройли ўйин ва бироз таваккал футбол учун миннатдорчилик билдираман. Биласизми, мен ҳам шунақаман. Дурангни ёмон кўраман. Ёки ғалаба, ёки мағлубият. Мана шундай ўйинларда йигитларнинг иродаси тобланади.