Мавсумнинг муҳим ўйинларига муносиб тайёргарлик кўриш мақсадида 21 январь куни БААга жўнаб кетган Ўзбекистон миллий терма жамоаси Дубайда машғулотларни давом эттирмоқда. ЎФФ матбуот котиби Санжар Ризаев берган маълумотга кўра, Миржалол Қосимов шогирдлари 22 январь куни «Жебел Али» меҳмонхонасининг спорт майдонларида шуғулланишган.

Ўзбекистон миллий терма жамоасининг 2013 йил ҳисобидан илк йиғинига бош мураббий Миржалол Қосимов жами 27 нафар футболчини жалб этган. Дастлабки таркибга киритилган футболчилардан бири – «Пахтакор» ҳимоячиси Егор Кримец жароҳат олиб, сафдан чиққани сабаб, унинг ўрни «Пахтакор»нинг бошқа бир вакили – ўнг қанот ҳимоячиси Даврон Ҳошимов билан тўлдирилган.

Миржалол Қосимов БАА йиғинига жами олти нафар легионер футболчини чақирган бўлиб, улардан Хитойнинг «Чангчун Ятаи» клуби ҳимоячиси Анзур Исмоилов, Россиянинг «Алания» клуби ярим ҳимоячиси Санжар Турсунов ҳамда Қозоғистоннинг «Иртиш» клуби ҳужумчиси Улуғбек Бақоев машғулотларда қатнашмоқда. Қозоғистоннинг «Актобе» клубидаги учлик – ярим ҳимоячи Темур Кападзе, ҳужумчилар Александр Гейнрих ва Марат Бикмаев терма жамоа ихтиёрига кейинроқ етиб келишлари кутилмоқда.

Санжар Ризаев берган маълумотга кўра, Ўзбекистон миллий терма жамоасининг асосий марказий ярим ҳимоячиларидан бири Азиз Ҳайдаров айни вақтда ўз клуби – Дубайнинг «Аш-Шабоб» клуби сафида шуғулланмоқда. Футболчи терма таркибига кечроқ қўшилади.

Ўзбекистон миллий терма жамоаси бош мураббийи бир қатор легионер футболчиларга ўз клублари сафида мавсумга тайёргарлик кўриш учун имкон яратиб берган. Масалан, терма жамоа сардори, Саудия Арабистонининг «Аш-Шабоб» клуби ярим ҳимоячиси Сервер Жепаров Гонгконг терма жамоасига қарши 6 февраль куни бўладиган Осиё Кубоги-2015 саралаш ўйини арафасида, 2 февраль куни терма ихтиёрига келиб қўшилади.

Маълумот ўрнида, Ўзбекистон миллий терма жамоаси БАА йиғини доирасида ўртоқлик учрашувлари ўтказишни режалаштирган. Жумладан, Қосимов шогирдлари 23 январь куни Россия Премьер-лигаси вакили «Краснодар» жамоасига қарши майдонга тушишса, йиғиннинг сўнгги куни – 1 февраль куни Озарбойжон миллий терма жамоаси билан ўртоқлик учрашувиўтказилади.