Еврофутбол ўз атрофидаги воқеалар билан ҳам гўзал.
Мана, яқинда Франция клуби ўз стадионида болалар учун чиройли акция уюштирди - «Ўйинчоқлар ёмғири». Тушунарлики, бунда майдонга фақат ёмшоқ ўйинчоқлар отилади.
Лига 1да чакки таассурот қолдирмаётган «Лилль» клуби раҳбарияти бу сафар бироз бошқача ташаббус билан чиқди. Аниқроқ айтсак, Франция чемпионати 14-туридан ўрин олган «Мец»га қарши ўйин (2:0) арафасида мухлислардан стадионга ёмшоқ айиқча ўйинчоғи билан келиш сўралди.
Шу тариқа учрашувдан олдин Вильнёв-д`Аск шаҳарчасидаги «Пьер Моруа» аренасида чиройли манзара юзага келди - майдонга юмшоқ айиқчалар ёмғир каби ёғилди. Франциялик мухлисларни бу борада олқишлаш керак. Зеро, улар клубнинг Янги йил байрами олдидан муҳтож болалар учун ўйинчоқ йиғиш акциясини баралла қўллаб-қувватлашди. Энди тўпланган юмшоқ айиқчалар Болалар ўйларига тарқатилади. Қандай ёқимли ва таъсирчан акция!
