Ўзбекистон миллий терма жамоасига номзод ярим ҳимоячи Азиз Ибрагимов фаолиятини Словакия чемпионатида давом эттириши мумкин. Трнаванинг «Спартак» клуби расмий сайти тарқатган хабарга кўра, Азиз Ибрагимов жамоа машғулотларида иштирок этмоқда. Бу ҳақда Kun.uz хабар тарқатмоқда.

«Спартак» сайтидаги хабарда ёзилишича, футболчи ҳозирча фақат кўрикдан ўтмоқда. Агар унинг ҳаракатлари жамоа мураббийларига маъқул келса, у билан шу ҳафтанинг ўзида шартнома имзоланиши мумкин. Қайд этиш жоиз, футболчи 23 январь куни «Серед» жамоасига қарши учрашувда майдонга тушиб, 90 дақиқа давомида жамоа сафида ҳаракат қилган. Ўйин «Спартак»нинг 6:0 ҳисобидаги ғалабаси билан якунига етган.

Азиз Ибрагимов профессионал футболчилик фаолиятини Тошкентнинг «Трактор» жамоасида бошлаган бўлиб, 2006 йили Муборакнинг «Машъал» жамоасидан Словакиянинг «Слован» клубига ўтган эди. 2008-2011 йиллар оралиғи Чехиянинг «Богемианс» жамоасида тўп сурган футболчи сўнгги мавсумни Хитойнинг «Циндао Жонун» клубида ўтказди.

Азиз Ибрагимов 2007 йил июлидан Ўзбекистон миллий терма жамоаси аъзоси ҳисобланади. Терма жамоа сафида 17 учрашувда майдонга тушиб, 3та гол уришга муваффақ бўлган ярим ҳимоячи Ўзбекистон термаси либосида охирги марта 2011 йилнинг 25 январида, Осиё Кубоги-2011 ярим финалидан ўрин олган Австралияга қарши ўйинда (0:6) майдонга тушган эди.