Миланнинг "Интер" жамоаси ҳимоячиси Федерико Димарко билан янги меҳнат шартномасини имзолаш бўйича амалда келишиб олди, бу ҳақда инсайдер Николо Скира ижтимоий тармоқларда хабар берди. 26 ёшли футболчининг шартномаси 2028 йилнинг ўрталарига қадар мўлжалланган.
Янги шартнома шартларига кўра, Димарконинг маоши йилига тўрт миллион еврогача ошади. Қолаверса, ҳимоячи бир миллион евро миқдоридаги бонусга эга бўлади.
Федерико "нерадзуррилар" академияси тарбияланувчиси ҳисобланади. Унинг миланликлар билан амалдаги шартномаси 2026 йилнинг ёзида якунига етади.
A Сериянинг жорий мавсумида Димарко 15 та ўйин ўтказиб, 3 та гол урди ва 4 та голли узатмани амалга оширди.
