Саудия Арабистони чемпионати хорижлик футболчиларга қўйилган чекловни юмшатиши мумкин.
The Telegraph хабарига кўра, Саудия лигаси келаси мавсумдан бошлаб қайдномада рухсат этилган хорижлик футболчилар сонини 10 нафарга ошириш масаласини кўриб чиқади. Ушбу чора трансфер бозорида мослашувчанликни таъминлаш, шунингдек, чемпионатнинг хорижлик футболчилар учун жозибадорлигини ошириш ва Саудия Арабистонининг футболдаги мавқеини мустаҳкамлаш мақсадида ишлаб чиқилган.
Ҳозирда Саудия клублари бир мавсумда қайдномага кўпи билан 8 нафар миллий бўлмаган ўйинчини киритиши мумкин. Жорий мавсумда чемпионатнинг барча 18 жамоаси квотани тўлдирди – таъкидланишича, хорижлик футболчиларнинг келишига, хусусан, Криштиану Роналду (“Ан-Наср”) ва Неймар (“Ал-Ҳилол”)нинг Саудия лигасига ўтиши ёрдам берган.
