Янги мавсумга Тошкентда тайёргарлик кўраётган «Локомотив» жамоаси аъзолари машғулотлар билан бир қаторда назорат-синов учрашувларига ҳам жиддий эътибор қаратмоқда. Бу бежиз эмас, зеро машғулотларида иштирок этаётган футболчиларни кўздан кечиришда бундай ўйинлар ас қотади. Бугун бўлиб ўтган «Локомотив» - «Гулистон» учрашуви ҳам мураббийлар учун фойдадан холи бўлмади. Учрашувда жамоа мураббийлар штаби бир қатор футболчиларни кўздан кечириб олишди.

Маълумки, ҳозир «Локомотив»нинг бир йўла тўрт нафар аъзоси миллий терма жамоамиз йиғинига жалб этилган. Шу боис «Гулистон»га қарши ўйинда Тўхтахўжаев, Иномов, Ҳасанов ва Нагаев жамоага ёрдам бера олишмади. Бу эса ўз навбатида мураббийларга бошқа футболчиларнинг имкониятларини текшириб олиш имконини берди.

Олдинга ўтиб айтиш керак, бутун учрашув давомида «Локомотив» рақибига нисбатан фаол ўйнади. Тўпни эгаллаб туриш, ҳужумлар ташкил этиш борасида темирйўлчилар Олий лига дебютантига дарс берди, дейиш ҳам мумкин. Бироқ, гулистонликлар ҳам ҳавфли ҳужумлар билан «Локо» ҳимоячилари ва посбонларини саросимага солиб туришди. Ўйиннинг 3-дақиқасидаёқ ҳисоб очилди. Жарима майдонига яқинроқ жойда «Гулистон» жамоаси аъзолари қоида бузишди ва юқоридан жарима майдонига узатилган тўпни Шадрин боши билан дарвозага жойлаб қўйди. Аммо, қолган дақиқаларда «Локомотив» футболчилари харчанд уринишмасин ўйинни томоша қилиш учун келган мухлислар бошқа гол кўришмади. Бир неча вазиятда ҳужумчиларимизга аниқлик етишмаган бўлса, айрим ҳолатларда дарвозабон маҳорати ёки дарвоза устуни ва тўсини тўпнинг тўрга бориб тушишига имкон бермади.

«Локомотив» – «Гулистон» – 1:0 (1:0). Дўрмон ўйингоҳи.
Ҳакам: И.Худойдатов
Гол: А.Шадрин (3).
«Локомотив»: Павел Бугало, Шерзод Шарипов, Руслан Мелзиддинов, Дилшод Жабборов, Салим Мустафоев, Дилшод Рахматуллаев, Иброҳим Раҳимов, Алан Кусов, Акмал Холматов, Александр Шадрин, Зайниддин Тожиев.
Захирадан тушганлар: Артур Парванов, Рустам Аъзамов, Павел Смоляченко, Собир Усмонхўжаев, Садриддин Абдуллаев, Виктор Карпенко, Фарҳод Тожиев, Темур Ғаниев.
«Гулистон»: Т.Ғаниев (Р.Абдужабборов), М.Қурбонов, Ж.Отажонов, С.Жўраев, Б.Акбаров, З.Қорақулов, К.Боев, Р.Ҳасанов, Э.Жаҳонов, И.Хайров, А.Шоғуломов.
Захирадан тушганлар: А.Саттаев, И.Жуманов, Ф.Мирюнусов, Н.Тешабоев, Р.Қодиров, Ғ.Самандаров, Д.Худойбердиев, А.Нўъмонов, Д.Усмонов.

«Локомотив» жамоаси аъзолари навбатдаги учрашувни 31 январь куни Бекободнинг «Металлург» клубига қарши ўтказишади. 1 февраль куни жамоа навбатдаги йиғинни ўтказиш учун яна БААга йўл олади.