"Наполи" бош мураббийи Вальтер Маццарри неаполликлар клуби қишки трансфер ойнасида таркибни кучайтиришни режалаштиряптими, деган саволга жавоб берди.
"Январь ойидаги трансферлар туфайли клубда инқилоб бўлишини кутмайман. Бу мумкин эмас. Мавжуд футболчилар ҳақида гапиришни афзал кўришимни яхши биласиз. Мен футболчиларга ўтган йилги ўйин даражасига қайтишларига ёрдам бермоқчиман", - деди Маццарри Corriere dello Sport билан суҳбатда.
Эслатиб ўтамиз, "Наполи" Италиянинг амалдаги чемпиони ҳисобланади, бироқ жорий А Серияда 17 турдан сўнг неаполликлар 27 очко жамғариб, айни дамда еттинчи ўринда бормоқда. Маццарри шогирдлари биринчи ўринда бораётган "Интер"дан 17 очко ортда қолмоқда.
