Криштиану Роналду ҳаммани яна бир бора ҳайрон қолдирди.
Бу сафар майдон эмас, унинг ташқарисида. Португалиялик юлдуз яқинда ўзи билан ўйнаган футболчилардан рамзий терма жамоа шакллантирди. Бироқ таркибга германиялик Месут Озилни қўшмади негадир. Ваҳоланки, икки футболчи «Реал»да жами 39та гол урганди ўзаро узатмалар орқали.
Кейин араб диёрида тўп сураётган яна бир футболчи - Карим Бензема ҳам ўз танловини эълон қилди. Энг қизиқ томони, франциялик ҳужумчининг орзу мисоли жамоасида на Криштиану Роналду бор ва на Лионель Месси...
Криштиану Роналдунинг Саудия Арабистони томон юзланганига деярли 1 йил бўлди. Португалиялик юлдуз 38 ёшида ҳам чин етакчи ролида! Дейлик, ҳозирда нафақат «Ал-Наср» клуби, балки бутун Саудия лигаси бош тўпурари бўлиб турибди. Асосийси, араблар айнан Кришни кўриш учун стадионларга талпилмоқдалар. Роналду яқинда араб медиаси илтимосига кўра, фаолияти давомидаги энг яхши клубдошларидан алоҳида жамоа тузди. Натижада ҳавас уйғотадиган таркиб юзага келди. Дарҳақиқат, ўта кучли жамоа, аммо Роналдунинг ўз таркибига Каземиро, Пепе ва айниқса, Месут Озилни киритмагани бироз ғалатидек. Дейлик, Месут ва Криштиану «Реал»да бирга жами 39та голдан хирмон ясашганди. Таққослаш учун факт: Роналду фаолияти давомида фақат Карим Бензема (76та) ва Гарет Бэйл (41та) билан боғламда бундан кўпроқ голда иштирок этган.
Карим Бенземанинг орзу жамоасида ғалатилик жиҳати янада кучли. «Ал-Иттиҳод» ҳужумчиси ўз талқинидаги рамзий терма жамоага узоқ йиллик яқин ҳамкори Криштиану Роналдуни қўшмади негадир. Шунингдек, Бензнинг рамзий 11талигида Лионель Мессига ҳам жой топилмади. Қисқаси, Карим жамоа ҳужумида ўзига шерик сифатида бразилиялик Роналдони танлади.
Криштиану Роналду билан бирга ўйнаганлар рамзий терма жамоаси
Икер Касильяс - Серхио Рамос, Рио Фердинанд, Жоржио Кьеллини, Марсело - Пол Скоулз, Тони Кросс, Лука Модрич - Гарет Бэйл, Карим Бензема, Уэйн Руни
Карим Бензема орзусидаги рамзий терма жамоа
Мануэль Нойер - Дани Алвеш, Пепе, Серхио Рамос, Марсело - Клод Макелеле, Поль Погба, Зайниддин Зидан, Роналдиньо - Роналдо, Карим Бензема
