"Челси" бош мураббийи Маурисио Почеттино ярим ҳимоячи Коул Палмернинг истиқболига юқори баҳо берди.
“Коул Палмер ажойиб ўйнамоқда. У вақт ўтиши билан Aнхел ди Марияга ўхшаб қолиш қобилияти ва салоҳиятига эга. Aлбатта, бу ҳали узоқ йўл, лекин у ҳақиқий плеймейкер - у ўйинни бир-бирига боғлай олади, гол уради, голли узатмани амалга ошира олади...", - деди Почеттино.
2023/2024-йилги мавсумда Коул Палмер “Челси” сафида 18 та ўйин ўтказди. Уларда ярим ҳимоячи олтита гол урди ва бешта голли узатмани амалга оширди.
Эслатиб ўтамиз, Палмер ёзги трансфер ойнасида «Манчестер Сити»дан «Челси»га ўтган эди.
