“Севилья”да ўйнаётган “Реал”нинг собиқ ҳимоячиси Серхио Рамос 2018 йилда допинг-тест топширишдан бош тортгани учун тергов қилинмайди, чунки тест синовларини ўтказишга уринаётганда агентлар томонидан қоидабузарликлар кузатилган, деб ёзади Relevo.
Манбага кўра, футболчи 2018 йилнинг апрелида Испания чемпионати доирасида "Малага"га қарши ўйиндан кейин допинг-тестдан ўтиши керак эди. Бироқ, у душ қабул қилишдан олдин тестларни топширишдан бош тортди. Бу антидопинг қоидаларини бузиш деб баҳоланиши мумкин. Бироқ допинг назоратини талаб қилинган икки киши ўрнига бир киши ўтказди ва шу сабабли Рамос жазодан қутулиб қолди. Допинг назорати пайтида иштирок этган иккинчи шахс унинг аккредитациядан ўтмаган отаси эди.
Аввалроқ Испания антидопинг агентлиги (CELAD) спортчилардан олинган ижобий допинг намуналари ҳақидаги маълумотни Бутунжаҳон антидопинг агентлигига (WADA) билдирмагани маълум бўлганди.
