«Ливерпуль» ҳужумчиси Муҳаммад Салоҳ «Ньюкасл»га қарши бўлиб ўтган ўйин (4:2) танаффусида бутсасини алмаштирганини айтди.

Мисрлик футболчи биринчи бўлимда пенальтидан фойдалана олмади. Унинг зарбасини "Ньюкасл" посбони Дубравка қайтарди. Иккинчи бўлимда эса Салоҳ дублга эришди. У голларининг бирини ўйин сўнгида пенальтидан урди.

«Танаффусда қўлдан чиқарилган вазиятларни муҳокама қилдик. Мен пенальтини голга айлантира олмадим. Бундай аҳволда терма жамоа сафига жўнаб кетишни истамасдим.

Биринчи бўлимда пенальти пайтида дарвозабон у ёқдан - бу ёққа ҳаракатлангани учун ўзимни йўқотиб қўйдим. Иккинчи пенальтини эса машғулотдагидек тепдим.

Биринчи бўлимда кийган бутсамда кечагина машғулот ўташни бошлагандим. Мен иримчи эмас, аммо уни алмаштиришни истадим. Бошқа бутса кийганимдан кейин хотиржам бўлдим», — деди Салоҳ.