Лицензиялаш регламентига асосан стадионлар прожекторини яхшилаш ишлари давом этади. Навбат Муборак шаҳридаги Баҳром Вафоев номли стадионга етиб келди.
Пролига вакили Машъал ўзининг уй учрашувларини ўтказадиган стадион йиллар давомида нормал прожектор ёруғлигига эга эмасди. Кунлар исий бошлагач, Муборак шаҳрида ҳаво ҳарорати нисбатан юқори бўлиши маълум. Бу эса ўз навбатида футболчилар учун қатор муаммоларни келтириб чиқаради.
Лига талаби билан Баҳром Вафоев стадиони прожекторлари янгиланди. 2-январ куни Лига мутахассиси Муборак шаҳрида бўлиб, янгиланган прожекторлар тақдим этаётган ёруғлик кўрсаткичларига аниқлик киритди. Унга кўра, айни вақтда стадион ўртача 1700 люкс ёруғликка эга. Бироқ шартномага кўра, прожекторларни ўрнатиш билан шуғулланган компания ёруғлик 1800-2000 люкс атрофида бўлишини таъминлаш керак. Шундан келиб чиқиб, Баҳром Вафоев стадионида бу борадаги ишлар давом этади. Мавсум стартига қадар Лига прожекторларни яна бир бор кўздан кечиради.
