“Бунёдкор” Бирлашган Араб Амирликларида янги мавсумга тайёргарлик кўришда давом этмоқда.

Бугун “қалдирғочлар” назорат учрашувида майдонга тушишади. Миржалол Қосимов шогирдларига қарши спарринг рақиб сифатида Москванинг “Спартак” клуби футболчилари саф тортишади. Учрашув “Шайҳ Зайид” стадионида Тошкент вақти билан соат 19:00да старт олади.

Валерий Карпин бошқарувидаги спартакчилар янги мавсумга Абу-Дабида тайёргарлик кўришмоқда. Яқиндагина Санкт-Петербургда ўтказилган МДҲ кубоги чемпионлари Дмитрий Қаюмов, Владимир Обухов ва Илья Кутепов бугунги клуб ихтиёрига қайтиб келишди. Шунингдек, “Спартак” машғулотларига Германияда даволаниб қайтган Сергей Паршивлюк ҳам қўшилди. Ўткир ҳужумчи Веллитон “Ростов” ёки Харьковнинг “Металлист” клубига кўчиб ўтиши ҳақидаги миш-мишларга қарамай у ҳамон клуб билан бирга бўлиб турибди. Бошқа бир ҳужумчи Эменике ўз терма жамоаси билан Африка миллатлар кубогида иштирок этмоқда.

Эслатиб ўтамиз, “Бунёдкор”нинг етакчи аъзолари айни пайтда миллий терма жамоа ихтиёрида бўлиб туришибди. Улар 1 февраль куни Озарбойжон миллий терма жамоасига қарши баҳсга тайёргарлик кўришмоқда.