Янги мавсум тараддудини кўраётган "Навбаҳор" ушбу ҳафтада Намангандаги йиғинни якунлайди. Жамоа мураббийи Усмон Асқаралиев кейини режалар ҳақида тўхталиб ўтди.

— Олиб борилаётган машғулотлар ҳақида тўхталиб ўтсангиз.
— Янги мавсумга тайёргарликни ҳозирча Наманганда олиб боряпмиз. Кунига икки маҳалдан машғулотлар ўтказяпмиз. Машғулотларда асосан жисмоний тайёргарликка урғу беяпмиз. Ўтказилаётган ўқув-машғулотларида бир қатор янги футболчиларни синовдан ўтказяпмиз. Кейинги йиғин Тошкентда давом эттирилади.

— Таркибдаги ўзгаришлар тўғрисида ҳам маълумот берсангиз.
— Шуни таъкидлаш жоизки, жамоанинг бу йилги таркиби асосан ёшлардан иборат бўлади. Вилоятимизда иқтидорли футболчилар жуда кўп. Фақат уларнинг истеъдодларини юзага чиқаришга ҳаракат қилиш керак. Айни пайтда Муҳаммад Абдуллаев, Мурод Раҳмонов сингари ёшлар машғулотларда маҳоратларини кўрсата олишса, янги мавсумда асосий таркибда майдонга тушишлари эҳтимолдан ҳоли эмас. Ҳаммаси ўзларига боғлиқ. Режамиздан барча позицияларни кучайтириш ҳам ўрин олган. Ҳозир бир қатор футболчилар билан музокаралар олиб борилмоқдаки, уларнинг исм-шарифларини ошкор қилмасликни маъқул кўраман. Чунки улар билан якуний келишувга эришганимиз йўқ.

— Легионерлар ҳам жалб этиладими?
— Албатта. Таркибимизга жалб этиладиган легионернинг юқори савиялиларини таклиф этиш ниятидамиз. Чунки аввалги легионерларнинг саноқлиларигина ишончни оқлашди, холос. Бу сафар хатоларни такрорламаслигимиз керак.

Улуғбек УМАРОВ суҳбатлашди