"Челси" ва "Манчестер Юнайтед"нинг собиқ ярим ҳимоячиси, ҳозирда "Ренн"да ўйнаётган Неманья Матич Англия Премьер-лигаси жамоасига ўтмоқчи. Бу ҳақда Get French Football News нашри хабар бермоқда.

Манба берган хабарга кўра, Матич "Ренн" жамоасидаги муҳитдан норози ва клуб раҳбариятидан шартномани зудлик билан бекор қилишни талаб қилмоқда. Қайд этилишича, сербиялик ярим ҳимоячи ўз вакилларига фаолиятини Англия чемпионатида давом эттириш вариантларини излаш ҳақида кўрсатма берган.

Матич ўтган ёзда "Рома"дан 2,5 миллион евро эвазига кўчиб ўтган "Ренн" футболчисига айланди. Жорий мавсумда ярим ҳимоячи барча мусобақаларда 19та ўйин ўтказиб, 2та голли узатмани амалга оширди. Футболчининг амалдаги клуби билан шартномаси 2025 йилнинг июнь ойи охиригача амал қилади.

Transfermarkt портали футболчининг тахминий нархини 3,5 миллион еврога баҳоламоқда.