"Милан"нинг янги ўйинчиси Марио Балотелли ўзининг таништирув маросимига бағишлаб ўтказилган матбуот анжуманида журналистларнинг саволларига жавоб берди.
Журналистлар ундан Англиядаги ёмон нарсаларни санаб беришни сўраган эдилар.
"Биринчи навбатда - матбуот. Кейин об-ҳаво ва егулик", - дея Балотеллининг сўзларини келтиради Британия интернет-нашрлари.
Эслатиб ўтамиз, қишки трансферлар ойнасининг сўнгги кунларида Италия термасининг ҳужумчиси 20 млн евро эвазига "Манчестер Сити"дан "Милан"га ўтган эди. Матбуот анжуманининг бошланишида "Милан" вице-президенти Адриано Галлиани Балотеллига 45 рақамли футболкани топширди.
