Франция чемпионатида 23-тур ўйинлари бошланди. "Тулуза" меҳмони бўлган ПСЖ навбатдаги йирик ғалабага эришди. Пасторе 4-дақиқадаёқ ҳисобни очган бўлса, кейин Златан Иброҳимович жамоага янги йилда қўшилган Лукас Моуранинг узатмасини голга айлантирди ва мавсумдаги йигирманчи голини киритди.
40-дақиқада мезбонлар ҳимоячиси М′Бенгенинг иккинчи сариқ карточкани олиб, майдондан четлатилиши эса, амалда ўйин натижаси ҳақида бошқа савол қолдирмади. Иккинчи таймда майдонга тушган икки нафар ҳимоячи биттадан гол уриб ҳисобни йирик кўринишга олиб келдилар.
Эътиборга моликки, ПСЖ сўнгги 8 учрашувда ўз дарвозаси даҳлсизлигини сақлаб келмоқда. Бу серия давомида парижликлар 7 ғалабага эришдилар, тўплар нисбати 18-0! Анчелотти шогирдлари очколари сонини 49 тага етказиб, "Лион"ни ортқа қолдирдилар. 46 очкога эга бўлган "Лион" якшанба куни "Аяччо" меҳмони бўлади.
ТУЛУЗА - ПСЖ 0:4 (0:2)
Голлар: Пасторе (4), Иброҳимович (36), М. Сако (70), ван дер Виль (73)
Тулуза: Аҳамада, М′Бенге, Яго, С. Орье, Абденнур, Сирьейс (Нинков, 46), Бен Йеддер (Эрмаш, 75), Капуэ, Табану, Дидо, Янник (Акпа-Акпро, 46).
ПСЖ: Сиригу, Жайе (ван дер Виль, 66), М. Сако (Конт, 76), Арман, Максвелл, Верратти, Матюиди, Пасторе, Лукас Моура, Лавесси (Менез, 71), Иброҳимович.
Огоҳлантириш: М′Бенге (27).
Четлатиш: М′Бенге (40).
