"Гранада"га қарши бўлиб ўтган Испания Ла-Лигаси 22-тури ўйини (0:1) дан сўнг "Реал" бош мураббийи Жозе Моуринью ўз жамоаси ўйини ҳақидаги фикрлари билан ўртоқлашди.
"Биз салбий натижага эришдик. Биз ҳаттоки дуранг имзолай олмадик ва бу ҳол мени мутлақо қониқтирмайди. Айниқса ўйиннинг биринчи бўлимида кўрсатган ўйинимиз мени ташвишлантирмоқда, дастлабки 45 дақиқани жуда ёмон ўтказдик.
Иккинчи бўлимда анча яхши ўйнай бошладик, ташаббусга эга бўлдик, бир неча вазиятлар яратдик. Лекин барибир ҳисобни тенглаштиришга, қилинган ишдан қандайдир қониқиш ҳисси ҳосил бўлишга эриша олмадик.
Жамоамиз муваффақиятсизликка мутлақо бошқача муносабатда бўлиши лозим. Бугун чоршанба куни "Барселона"га қарши 90 дақиқа ўйнаганлар ҳам, ўйинни захира ўриндиғидан кузатганлар ҳам майдонга чиқишди. Улардан дастлаб санаганларим нега чарчаганини тушунаман: улар қизғин ва жиддий ўйин ўтказишди, улкан ишларни амалга оширишди.
Лекин чоршанба куни захира ўриндиғида ўтирган ва ҳаттоки ўйин қайдномасига ҳам киритилмаган баъзи ўйинчиларда нега бу қадар чарчоқ кузатилгани мени ҳайрон қолдирмоқда. ("Гранада"га қарши майдонга тушганлардан Фабиу Коэнтрау, Серхио Рамос, Анхель Ди Мария ва Марсело "Барселона"га қарши кубок ярим финалида майдонга чиқишмаган эди).
Чемпионат тақвимини ҳам алоҳида тилга олиб ўтишни истайман. Бир ҳолат борки, анчадан буён кундек равшан бўлиб қолмоқда. Тақвим тузилишига таъсир эта олмайдиган, ўз таклифларини эшитишларига эриша олмайдиган жамоалар бор. Чоршанба куни "Реал" ҳам, "Барселона" ҳам кўп куч сарфлаб, катта ўйин ўтказишди. Бироқ чемпионатда у жамоаларнинг бири бугун ўйнамоқда, иккинчиси эса эртага ўйнайди. Бу ҳол доимий такрорланмоқда.
Албатта, ғалабалар қўлга киритилиб турилганда, сиз — журналистлар бутун шарафни жамоага топшириб қўясизлар. Жамоа ютқазса — мураббий айбдор. Биз яхши ўйин ўтказа олмадик, жамоа ҳам ўзининг яхши тарафини намойиш этиб бера олмади — бугун натижа учун бор масъулиятни ўз зимамгна оламан», — деди Моуринью.
