Терма жамоада жамоа менежери ким билмадиму, лекин ўйинлар вақтида хушёр бўлиб туришни тавсия қилган бўлардим.

Ўзимнинг эсимда қолган иккита вазиятни айтиб ўтаман.

1. "Пахтакор" ОЧЛда бир жамоа билан ўйнаётган эди (жамоа ва қайси давлатдан эканлигини айтмай қўя қоламан). Рақиб жамоа жуда шаллақи жамоа эди. Ҳар бир вазиятда бақир чақир қилиб, арзимаган нарсага ҳам ўлиб қолгандак ётиб оладиган, ўйинчи-ю мураббийлар эса ҳакамга босим ўтказадиган жамоа эди.

Энг ёмони ҳакам рақиб босимига учраб уларга ён босишни бошлади. Ҳар бир вазият рақиб жамоа фойдаси ҳуштак чалиш билан тугаётган эди. Тўртинчи ҳакамни олдига бориб "вазиятни кўряпсанми?  Ҳакам нариги жамоа босимига дош бера олмай уларга ён босишга тушиб кетяпти" дедим. Тўртинчи ҳакам ҳам бу нарсага аҳамият берган экан. "Ҳа кўряпман. Танаффусда гаплашаман у билан. Тушунтираман. Хавотир олма" деди.

Танаффус бўлди. Иккинчи бўлим ҳам бошланди. Ҳакам ҳақиқатан ўзгарди. Рақиб жамоа қанча шаллақилик қилмасин, босим ўтказмасин ҳакам умуман эътибор бермай қўйди. Шаллақилик фойда бермаганини кўрган рақиб бу айёрлигини анча камайтирди. "Пахтакор" ўша ўйин ғалаба қозонди.

2. Яна ОЧЛдаги ўйин. Ҳакам қандайдир хато қилди. Мураббийимиз унга нимадир деб қўйди. Ҳакам қизил бераман деб югуриб келди. Чўнчагидан қизилни олишга қўл узатаётган эди. Югуриб чиқдимда "иии тўхта тўхта, унақа қилма, жаҳлда оғзидан чиқиб кетди. Асабийлашишда бўлади-ку биласан-ку" дедим. Ҳакам мураббийдан мен билан гаплашишга ўтиб кетди. Мен мураббийни захира ўриндиғига жўнатиб юбордим. Ҳакам билан озгина гаплашгандан кейин ҳакам менга заҳрини соча соча қизил бермай кетди.

Бундай олиб қараса арзимаган нарсалар, лекин фойдаси тегадиган нарсалар. Биринчи вазият ҳатто ҳисобга ҳам таъсир қиладиган вазият эди.

Равшан Салимов.