Даниэле де Росси "Рома"нинг янги бош мураббийига айланди.
Италиялик собиқ футболчи билан шартнома 2024 йилнинг 30 июнига қадар амал қилади. Келишув муддатини узайтириш муайян мақсадларга эришиш шарти бўлиши маълум қилинди.
Де Росси римликлар сафида 616 та ўйин ўтказган. Футболчи сифатида у клуб билан икки марта Италия кубоги ва бир марта мамлакат Суперкубогини қўлга киритган.
2021 йилнинг март ойида у Роберто Манчини штабига Италия терма жамоасида ишлаш учун келиб қўшилди. Ўша йилнинг ёзида Италия Евро-2020да ғолиб чиқди.
Кейин Де Росси СПАЛни бошқарди. У ерда 2022 йилнинг октябридан 2023 йилнинг февралигача ишлаган.
Эслатиб ўтамиз, бугун “Рома” Жозе Моуриньони истеъфога чиқарган эди. Ҳозир жамоа турнир жадвалида 9-ўринда, 4-ўриндан фарқ 5 очкони ташкил қилмоқда.
