Гонконг терма жамоаси бош мураббийи Ким Понг Гон ўйин олдидан ўтказилган матбуот анжуманида рақибга қарши кучли тайёргарлик кўрилганини таъкидлаб ўтди.

— Ўзбекистон жуда кучли футбол мамлакати. Биз рақибимизни ҳурмат қиламиз. Лекин шу билан бирга кучли Ўзбекистонга қарши жангга тайёрмиз — дейди бош мураббий.

— Ҳамма нарса аъло даражада. Эртага биз ғалаба қозониб, Гонконгга яхши натижа билан қайтмоқчимиз, — дея таъкидлади Ву Кван Йи.

— Сиз Ўзбекистон ўйинини ўргандингизми?
— Ҳа, биз Жанубий Корея, Ливан терма жамоаларига қарши ўтказилган ўйинни томоша қилдик. Шунингдек Кей лигада ўйнаган баъзи ўзбек футболчиларини яхши биламан. Терма жамоа таркибида ўйнайдиган футболчиларни ҳам яхши биламан. Биз ўйинларни таҳлил қилдик ва яхши тайёргарлик кўрдик.

— Гонконгда 20 даража иссиқ экан, бизда эса об ҳаво анча совуқлигини кўриб турибсиз. Бу нарса ўйинга таъсир ўтказмайдими?
— Тўғри, жуда ҳам фарқли климат. Леин яна бир нарса борки, иссиқда ўйнагандан кўра совуқда ўйнаган маъқулроқ. Биз совуқ ҳавода яхшироқ футбол ўйнаймиз. Аксинча, совуқ ҳаво ўйинимизга яхши таъсир қилади. Биз ҳозирча об-ҳаво ҳақида ўйламаяпмиз. Эртага бу нарсага ўзингиз ҳам ишонч ҳосил қиласиз.

— Ўйинга қандай услубда тайёргарлик кўрдингиз?
— Биз Шарқий Осиё Кубоги саралаш босқичида иштирок этиш орқали ўйинга тайёргарлик кўрдик. Тайёргарлигимиздан хавотир олманг, эртага бунга ўзингиз ҳам гувоҳ бўласиз.

— Терма жамоангизнинг Осиё Кубогига чиқиш имкониятини қандай баҳолайсиз?
— Биламан, қийин бўлади. Аммо биз ҳозирда тараққиёт йўлидан кетмоқдамиз. Нима учун чемпионатга йўл олиш ҳақида ўйламаслигимиз керак экан? Биз албатта олға кетамиз.

— Интернет орқали ўқидик, "МЮ" билан ўртоқлик ўйинлари ташкил қилинаркан. Бу нарса федерациянинг етакчи клублар билан муносабати яхшилигидан далолатми?
— Бундан унчалик ҳам хабардор эмасман, билганим шуки икки мамлакат федерациялари орасида муносабат яхши йўлга қўйилган ва инглиз клублари билан ўйин ҳар йили ўтказилади. Бу нарса биз учун янгилик эмас.

— Ўзбекистон таркибида Гонконг учун алоҳида хавфли бўлган футболчиларни айтсангиз.
— Сервер Жепаров, Азиз Ҳайдаров ва Санжар Турсуновларни алоҳида кўрсатишим мумкин.

— Ўзбекистон билан аввалги ўйинда дуранг ўйнаган футболчилардан таркибда қолганми?
— Жуда қизиқ савол, аммо мен энди икки ой бўлди бош мураббий этиб тайинланганимга. Таркиб унчалик ҳам ўзгармаган. Демак, ўша ўйинларда қатнашган футболчилар ҳам ҳозир сафимизда бўлиши керак.

— Эртага бўладиган ўйинда нималарга умид қилмоқдасиз. Қарши ҳужумларгами ёки бошқа услубларингиз борми?
— Биз ўз тактик-стратегик тайёргарлигимизни ошкор этмоқчимасмиз. Бу ҳақида ўйиндан сўнг билиб оласиз. Ишончим комилки, ўйиндан сўнг сизда Ўзбекистон терма жамоаси бош мураббийига саволлар кўп бўлади.

— Икки кун олдин Гонконг ички биринчилиги ўйинлари бўлиб ўтди. Таркибингизда фақат битта легионер бор ва барча футболчилар икки кун олдин ўйнаган. Чарчоқ ўйинга қандай таъсир қилиши мумкин?
— Яхши савол. Ўтган ҳафта тур ўйинларидан анча чарчаганмиз. Лекин умид қиламанки, бизнинг футболчиларимиз кучли ирода намойиш этиб, рақибни албатта енгишади. Эртага бизнинг футболчиларимиз Гонконг-Хитой иродаси қанчалик кучли эканини намойиш этиб беришади.

— Терма жамоамизнинг қайси жиҳатлари кучли деб ўйлайсиз?
— Ўзбекистон жуда кучли иродага эга, жисмонан кучли ва тезкор футбол намойиш этади. Айниқса охирги йилларда терма жамоангиз сезиларли даражада ўсди. Умид қиламанки, айнан эртанги ўйинда биз янги тажрибага эга бўламиз ва кейинчалик ўрганганларимизни амалиётда қўллаб, ўсишга эришамиз. Ўйнаш учун ҳамма нарса яхши ҳолатда, майдонга ҳам, шароитга ҳам эътироз йўқ.