"Милан" бош мураббийи Стефано Пиоли "россонери" вингери Рафаэль Леауни қўллаб-қувватлади, у бу мавсум олдингисига нисбатан анча камтарона ўйин кўрсатмоқда.

“Бу мавсум ўтган йилгидан кўра кўпроқ гол урдик. Биз лигадаги иккинчи энг яхши ҳужумкор жамоамиз ва ўйлайманки, бунда Леаунинг ҳам алоқаси бор. У биз учун ҳужумда таянч нуқтаси бўлиб, рақиб ҳимоячиларини чалғитади. У А Серияда энг кўп узатмаларни амалга оширувчи футболчилардан бири. Рафа билан майдон ташқарисида ҳам яхши муносабатдаман. У майдондаги рассом ва даҳодир", - деб Пиоли сўзларини келтирмоқда Milan News.

Жорий мавсумда Леау барча турнирларда 25 та ўйинда қатнашиб, 6 та гол ва 6 та голли узатмага муаллифлик қилган. Ўтган мавсумда португалиялик барча турнирларда 48 та ўйин ўтказиб, 16 та гол урган ва 15 та голга ассистентлик қилган.