"Арсенал" бош мураббийи Микель Артета бир неча кун олдин ўз атрофидагиларни жорий мавсум охирида "канонирлар"даги фаолиятини тугатиш ҳақида ўйлаётгани ҳақида огоҳлантирганди. Бу ҳақда Sport.es хабар бермоқда.

Манбага кўра, Артетанинг "канонирлар" билан 2025 йилгача мўлжалланган шартномаси бор, аммо йиллар ўтиши ва сўнгги мавсумларда юзага келган кескинликлар ҳам мураббийга ўз таъсирини ўтказган кўринади. Унинг Лондон клуби хўжайинлари билан яхши муносабатда бўлиши унга мавсум якунланганидан кейин ўзаро келишувга кўра эҳтимолий чиқиш бўйича музокаралар олиб бориш имконини беради. Микель бу ҳақда ўз доираларини аллақачон маълум қилган, аммо айни дамда мураббий жорий мавсумнинг якуний қисми "Арсенал" учун қандай кечишини кўришни режалаштирмоқда.

Эслатиб ўтамиз, аввалроқ “Барселона” бош мураббийи Хави ва “Ливерпуль” бош мураббийи Юрген Клопп мавсум якунида жамоани тарк этишларини эълон қилган эди.