"Пахтакор" Украинанинг "Черноморец" клубига қарши назорат учрашувини ўтказди. Ўйиннинг дастлабки бўлимида ҳисоб очилмади. Илк 45 дақиқаликда ҳар иккала томон бир қатор ҳужумлар ташкил қилишди. "Пахтакор" сафида 22-дақиқада Игорь Сергеев 9 метрлардан кучли зарба берди, ушбу зарбани дарвозабон қайтарди. 32-дақиқада Махарадзенинг 18 метрлардан йўллаган зарбасини ҳам посбон майдон ташқарисига чиқариб юборишга эришди. Рақиб сафида Максим Шацких, Бакай ва Бобко каби футболчилар яхши имкониятларга эга бўлишди, аммо бир қатор вазиятларда Темур Жўраев жамоамизни голдан қутқарган бўлса, баъзи вазиятларда футболчиларга аниқлик етишмади.
 
59-дақиқада Жора Оганесян жарима тўпидан сўнг юқори тўққизликни нишонга олди, бироқ бу сафар ҳам тўп йўлига "Черноморец" посбони тўғаноқ бўлди. 61-дақиқада ҳисоб очилди. Рақибнинг тўп йўқотишидан сўнг чап қанотдан бошланган қарши ҳужумни Игорь Сергеев аниқ зарбаси билан якунлади - 1:0. 70-дақиқада ҳисоб тенглашиши мумкин эди, аммо Де Матоснинг зарбаси дарвоза устуни ёнидан ўтиб кетди. 74-дақиқада барибир украиналиклар ҳисобни тенглаштира олишди. Зубейко-Де Матос комбинациясини захирадан майдонга тушган Риера самарали тарзда якунлади - 1:1. 76-дақиқада Сергеев дублга эришиши мумкин эди, аммо унинг яқин масофадан йўллаган кучли зарбасини Безотосний қайтарди. Қолган дақиқаларда ҳисоб ўзгармади ва учрашув 1:1 ҳисоби билан якунланди.
 
Назорат учрашуви
«Пахтакор» - «Черноморец» 1:1
13 февраль 2013 йил. Белек (Туркия). «IC» футбол майдони
 Голлар: Сергеев, 61 - 1:0. Риера, 74 - 1:1
«Пахтакор»: Жўраев, Мерзляков, Козак, Исматуллаев, Ҳошимов, Андреев, Шарофетдинов, Махарадзе (с), Оганесян (Искандеров, 68). Каримов, Сергеев (Шихов, 85). 
«Черноморец»: Безотосний (с), Бергер, Фонтанельо, Сантана, Зубейко, Политило, Старгородский, Де Матос, Шацких, Бобко, Бакай.