Мадриднинг “Реал” клуби ҳужумчиси Винисиус Жуниор Бирлашган Миллатлар Ташкилотининг Таълим, фан ва маданият масалалари бўйича агентлиги ЮНЕСКОнинг яхши ният элчисига айланди.
ЮНЕСКО бош директори Одри Азуле “Реал Мадрид” машғулотлар марказига ташриф буюрди ва футболчига янги лавозимга тайинлангани ҳақидаги расмий хатни топширди.
“Винисиус Жуниор нафақат ажойиб футболчи, у Бразилияда таълим соҳасида тенг имкониятларнинг кучли тарафдори ҳам.
У бутун бир авлод учун намунадир. ЮНЕСКО бугунги кунда унинг яхши ният элчиларидан бири эканлигидан фахрланади” - деди Азуле.
Қайд этилишича, мадридлик футболчи сўнгги йилларда Бразилиядаги барча ёшларнинг таълим олишини таъминлаш учун ҳаракат қилган. 2021 йилда у ноқулай ҳудудлардаги бразилиялик болалар ва ўсмирларга мактабга қайтиши ва таълим олишига ёрдам бериш учун Instituto Vini.Jrга асос солган.
Бу ЮНЕСКО тарихида иккинчи марта бразилиялик футболчининг Яхши ният элчисига айланишидир. Винисиусдан олдин бу роль Пелега берилганди.
