ФИФА миллий терма жамоаларнинг навбатдаги рейтинг жадвалини эълон қилди. Бу галги рейтингда терма жамоамиз 1 поғона пастга тушиб, 57-ўринга жойлашди.

Гонконг миллий терма жамоасига қарши Осиё кубоги-2015 саралаш баҳсида қайд этилган дуранг натижасида ҳисобимиздаги рейтинг очколари сони 2 баллга ошган (557 балл). Аммо айрим терма жамоаларнинг юқорига кўтарилиши (масалан, Африка вице-чемпиони — Буркина-Фасо) ва айрим жамоаларнинг қуйига тушиши оқибатида, бу галги рейтингда 1та ўрин пастладик.

Эрон терма жамоаси эса 2 поғона кўтарилди ва биздан кейинги ўрин — 58-поғонага чиқиб олди. Энди Ўзбекистон ва Эрон терма жамоалари тўплаган очколар орасидаги фарқ 14 баллни ташкил қилмоқда.

ЖЧ-2014 саралаш гуруҳидаги рақибимиз Жанубий Корея эса 4 поғона пастлаган (38-ўрин). Бунга кореяликларнинг Хорватия билан ўйинда мағлубиятга учрагани сабаб бўлди. Қатар эса 5 поғона кўтарилди. Аммо бу кўтарилиш уларга юзликка кириш имконини бермади (101-ўрин). Ливан эса 1 ўрин пастлади ва 131-ўринда қайд этилди.

Гонконг миллий терма жамоаси Ўзбекистон билан дуранг ўйнаганидан кейин 7 поғона кўтарилишга муваффақ бўлди ва 156-ўринни банд этишди. Осиё кубоги-2015 саралашидаги бошқа рақибларимиз — Вьетнам эса 134-ўринни эгаллаб турган бўлса, БАА юзликка кирди — 99-ўрин.

Осиёнинг энг яхши жамоаси номи Японияга тегишли бўлиб турибди. Улар янги рейтингда 6та ўрин пастлашга мажбур бўлишган. Иккинчи поғона эса Австралияга тегишли (37-ўрин).

Рейтинг жадвалини Испания бошқармоқда. Иккинчи ва учинчи ўринларда ҳам ўзгариш юз бермади - Германия ва Аргентина. Англия терма жамоаси эса бирданига 2 поғона сакраб, 4-ўринга чиқиб олди. Натижада Италия ва Колумбия бир поғонадан пастлашди.

МДҲ давлатлари орасида Россия терма жамоаси 10-ўринда (-1) бораётган бўлса, Украина эса 46-ўринга (-2) жойлашган. Ўзбекистон бу минтақа давлатлари орасида учинчи поғонани эгаллаган.

Февраль ойи рейтинги билан ФИФА расмий сайтида танишиб олишингиз мумкин.